Olangan 27

27:1 Saellana jareya Mosa asareng ban pin-pamimpinna Isra'il manapa' pessen reya ka bangsa Isra'il, "Toro' sakabbinna parenta se epanapa' ka ba'na sateya reya.
27:2 E are teppa'na ba'na alengka Songay Yordan maso'a ka nagara se eparengngagi ka ba'na bi' GUSTE Allahna rowa, ba'na kodu mamanjeng to-bato se raja, pas labur.
27:3 Toles e to-bato jareya saneyap oca' dhari kom-hokom reya. Mon ba'na la maso' ka nagara se sogi ban landhu se ejanjiyagi ka ba'na bi' PANGERAN, Allahna bangatowana ba'na,
27:4 ban ba'na la badha e bara'anna Songay Yordan, ba'na kodu entar ka Gunong Ebal. E jadhiya ba'na kodu maddek ban alabur to-bato jareya akantha se eparenta'agi ka ba'na bi' sengko' are teya reya.
27:5 E kennengngan jareya ba'na kodu maddek keya mezba se eatorragiya ka GUSTE Allahna; kagabay dhari bato se gi' ta' tao elakone ban pakakas dhari besse,
27:6 sabab saneyap mezba se eatorragiya ka GUSTE Allah kodu ekagabay dhari bato se ta' abung-sambung. E mezba jareya ba'na kodu ngatorragi ban-kurban obbaran.
27:7 Atorragi keya kurban kasalameddan, kurban jareya kakan e jadhiya, sambi agumbiraan e ajunanna GUSTE Allahna.
27:8 E to-bato se la elabur jareya ba'na kodu noles paterrang saneyap oca' se badha e dhalem kom-hokomma Allah."
27:9 Saellana jareya, asareng ban para imam Lewi, Mosa adhabu, ka sakabbinna bangsa Isra'il, "Tan-taretan, mara padha edhingngagi pateppa'! Are teya ba'na la daddi ommadda GUSTE Allahna.
27:10 Daddi ba'na pata'at ka GUSTE Allahna ban lakone sakabbinna papakonna se bi' sengko' epanapa' ka ba'na sateya reya."
27:11 Dhabuna Mosa ka bangsa Isra'il,
27:12 "Mon ba'na la alengka Songay Yordan, suku Simeyon, Lewi, Yehuda, Isakhar, Yusup ban Benyamin kodu manjeng e attas Gunong Gerizim e bakto ebaca'agi berkat ka bangsa reya.
27:13 E bakto ebaca'agi babaston, suku Ruben, Gad, Asyer, Zebulon, Dan sarta Naftali kodu manjeng e attas Gunong Ebal.
27:14 Reng-oreng Lewi kodu ngoca'agi ca'-oca' se kasebbut e baba reya pakaja, ban reng-oreng Isra'il kodu nyaodi 'Amin'.
27:15 Reng-oreng Lewi, 'Ta' salamet oreng se agabay arca dhari bato, kaju otaba logam, sarta tek-ngetek nyemba arca jareya; PANGERAN baji' ka lalakon nyemba brahala.' Reng-oreng Isra'il kodu nyaot kabbi, 'Amin!'
27:16 'Ta' salamet oreng se ta' hormat ka oreng towana ban ta' parduli maske odhi'na oreng towana nyangsara.' 'Amin!'
27:17 'Ta' salamet oreng se ngerset batessa tanana tatanggana.' 'Amin!'
27:18 'Ta' salamet oreng se ngeba oreng buta ka jalan se sala.' 'Amin!'
27:19 'Ta' salamet oreng se arampas ha'na oreng manca, na'-kana' jatim ban para randha.' 'Amin!'
27:20 'Ta' salamet oreng se ya-nyeya eppa'na kalaban cara ngapolong tedhung sala settonga binena eppa'na.' 'Amin!'
27:21 'Ta' salamet oreng se apolong tedhung bi' keban.' 'Amin!'
27:22 'Ta' salamet oreng se apolong tedhung ban taretan bine'na se tonggal eppa' tonggal embu', otabana taretan bine'na se tonggal eppa' otaba tonggal embu'.' 'Amin!'
27:23 'Ta' salamet oreng se apolong tedhung ban mattowa bine'na.' 'Amin!'
27:24 'Ta' salamet oreng se tek-ngetek mate'e oreng.' 'Amin!'
27:25 'Ta' salamet oreng se narema sogo' polana esoro mate'e oreng se ta' sala.' 'Amin!'
27:26 'Ta' salamet oreng se ta' ngestowagi hokomma ban pangajaranna Allah e dhalem odhi'na.' 'Amin!' "