Kalowaran 40

40:1 Dhabuna PANGERAN ka Mosa,
40:2 "Tang Kemah paddek e tanggal settong bulan settong.
40:3 Petthe Parjanjiyan se aesse Tang Papakon se Sapolo rowa saba' e dhalemmanna, e adha'anna pobuwi bir-tabir.
40:4 E dhalemmanna pobuwi meja ban e attasanna meja jareya saba' sakabbinna parlengkabanna se ekaparlo; pobuwi keya ko'tongko'na damar ban damar se kodu esaba'e attasanna ko'-tongko' jareya.
40:5 E adha'anna Petthe Parjanjiyan jareya pobuwi mezba dhari emmas kaangguy ngobbar dupa, e labangnga Kemah pobuwi bir-tabir.
40:6 E adha'anna Kemah jareya pobuwi mezba kaangguy kurban obbaran
40:7 cemmong baddhana aeng saba' e antarana Kemah ban mezba, pas esse'e aeng.
40:8 E taneyanna Kemah jareya sakalenglengnga pobuwi lajar, ban e labangnga taneyan jareya pobuwi bir-tabir.
40:9 Mon la mare, Kemah ban kas-pakakassa kodu esocceyagi kabbi. Carana iya areya Kemah ban kas-pakakassa jareya mennya'e mennya' opacara. Kalaban cara se kantha jareya, Kemah ban kas-pakakassa jareya la ekusussagi ka Sengko'.
40:10 Mezba ban kas-pakakassa kodu esocceyagi kalaban cara se kantha jareya keya, sopaja kabbi ekusussagiya ka Sengko'.
40:11 Bariya keya cemmong baddhana aeng ban ga'-tengga'na rowa kodu esocceyagi keya.
40:12 Saellana jareya Harun ban na'-ana'na soro entar ka labangnga Kemah Socce jareya, pas soro socce'e kabbi.
40:13 Harun angguyi pangangguyya imam, pas mennya'e, sopaja Harun daddi imam se ngabdi ka Sengko' malolo.
40:14 Saellana jareya na'-ana'na soro nyander ka seddi'anna, pas pangangguy kameja.
40:15 Saellana pas mennya'e, papadha ban se amennya'e eppa'na, sopaja na'-ana'na Harun jareya daddi imam se ngabdi ka Sengko' malolo. Kalaban opacara se kantha jareya sukuna Harun ron-temoron bakal neggu'a jabatan imam."
40:16 Mosa alampa'agi sabarang se edhabuwagi PANGERAN jareya.
40:17 Daddi e tanggal settong bulan settong e taon se kapeng dhuwa' saellana bangsa Isra'il ondur dhari Messer, Kemah Socce jareya la epaddek.
40:18 Mosa masang gan-langganna, majaga rangkana, masang ju-kajuna se malang sarta masang ga-canggana.
40:19 Saellana jareya pas epasang ata'na, e bagiyan lowar e attasanna, etotobi, menorot se edhabuwagi PANGERAN.
40:20 Papan batona se dhadhuwa' epondhut, pas esaba' ka dhalem Petthe Parjanjiyan Totobba Petthena epasang, kol-pekolla esono'agi ka long-kolongnga.
40:21 Petthe jareya pas esaba' e dhalem Kemah, e adha'anna epobuwi bir-tabir, menorot se edhabuwagi PANGERAN.
40:22 Mosa nyaba' meja e dhalem Kemah jareya, e bagiyan dhaja e lowaranna bir-tabir,
40:23 e attasanna meja jareya esaba'i roti sasajin, akantha se la edhabuwagi PANGERAN.
40:24 Ga'-tengga'na damarra esaba' e dhalem, e bagiyan lao', epadhep-adhebban bi' mejana.
40:25 Mar-damarra eodhi'i e ajunanna PANGERAN.
40:26 Mezbana se dhari emmas esaba' e dhalem Kemah, e adha'anna bir-tabirra.
40:27 Mosa pas ngobbar dupa se ro'om e attasa meja jareya.
40:28 E Labangnga Kemah jareya bi' Mosa epobuwi bir-tabir,
40:29 e adha'anna labangnga Kemah epobuwi mezba kennengnganna kurban obbaran ban kurban sasajin.
40:30 Cemmong baddhana aeng pabaccowan esaba' e antarana Kemah ban mezba, pas eesse'e aeng.
40:31 Mosa, Harun ban tra-pottrana maccowe asta ban padana e jadhiya,
40:32 sabban maso'a ka Kemah Socce jareya otaba mon entara ka seddi'anna mezba.
40:33 E sakalenglengnga Kemah ban mezba jareya bi' Mosa epasange ga-canggana taneyan se epasange lajar, dineng labangnga taneyanna epasange bir-tabir. Daddi lalakon jareya la mare kabbi.
40:34 Saellana jareya pas toron ondhem se notobi Kemah Socce jareya, ban sonar kahadiranna PANGERAN mossa'e Kemah jareya.
40:35 Daddi Mosa ta' bisa maso' ka Kemah jareya.
40:36 Mon ondhem jareya ongga kalowar dhari Kemah jareya, bangsa Isra'il abungkar kemahna bang-sebang, pas ngalle ka kennengngan laen.
40:37 Tape mon ondhem jareya ta' ongga, bangsa Isra'il paggun ta' aginjeggan dhari kennengnganna.
40:38 Saabidda bangsa Isra'il jareya badha e dhalem parjalanan, PANGERAN alenggi e Kemah jareya aropa ondhem e bakto seyang ban apoy e bakto malem.