Kadaddiyan 2

2:1 Daddi alam dunnya la mare ecepta'agi kabbi.
2:2 E are se kapeng petto' sabarang se elampa'agi Allah la mare kabbi, ban Allah pas aistirahat.
2:3 Are se kapeng petto' jareya laju eberkadi pas ekusussagi ka Salerana, sabab e are se kapeng petto' jareya Allah aistirahat saellana mare se nyepta'agi alam dunnya.
2:4 Kantha jareya caretana langnge' ban bume e bakto ecepta'agi. E bakto GUSTE Allah abadhi alam dunnya,
2:5 e bume gi' tadha' ne-bine se nyelbi' ban gi' tadha' bu-tombuwan, sabab GUSTE Allah gi' ta' matoron ojan ban gi' tadha' oreng se agaraba tana.
2:6 Tape aeng la molae nyerrep dhari baba sampe' kole'na bume bacca.
2:7 GUSTE Allah laju mondhut tana sakone', pas ebadhi manossa, manossa jareya eparenge nyaba se maodhi', se eserrobbagi ka dhalem lobangnga elongnga; daddi manossa jareya pas odhi'.
2:8 Saellana jareya GUSTE Allah pas abadhi bun-kebbunan e Eden, mongging temor; manossa se ebadhi gella' esaba' e jadhiya.
2:9 GUSTE Allah laju matombu samacemma ka'-bungka'an se gus-bagus, se ngasellagi wa'-buwa'an se man-nyaman. E nga'-tengnga'anna bun-kebbunan jareya badha bungkana kaodhi'an, ban bungkana pangataowan parkara se becce' ban se juba'.
2:10 Bun-kebbunan jareya tanana bacca polana egili'i songay dhari Eden; e lowarra Eden songay jareya acangka empa'.
2:11 Cangkana se nomer settong nyamana Pison, agili ngobengnge nagara Hawila.
2:12 E jadhiya ngasellagi emmas morne ban mennyan se malarat sareyanna, sarta to-bato mamatan.
2:13 Songay se nomer dhuwa' nyamana Gihon; aengnga agili ngobengnge nagara Kus. *Kus (e Mesopotamia); otaba Sudan.*
2:14 Songay se nomer tello' nyamana Tigris, agili e temoranna Asyur. Ban songay se nomer empa' nyamana Efrat.
2:15 Saellana jareya GUSTE Allah pas nyaba' manossa gella' e bun-kebbunan Eden, kaangguy agarab ban meyara bun-kebbunan jareya.
2:16 GUSTE Allah pas adhabu ka manossa jareya, "Ba'na olle ngakan buwana sakabbinna ka'-bungka'an e bun-kebbunan reya,
2:17 kajabana buwana bungkana pangataowan parkara se becce' ban se juba'. Mon ba'na ngakan buwa jareya, sanatkala jareya keya ba'na bakal mateya."
2:18 GUSTE Allah laju adhabu, "Ta' becce' mon manossa reya kadibi'an. Bi' Sengko' egabayyagiya kanca se cocok, me' olle abanto manossa reya."
2:19 GUSTE Allah laju mondhut tana se pas ebadhi samacemma keban se odhi' e tana ban se odhi' e bang-abang. Ban-keban jareya bi' GUSTE Allah ebakta ka manossa gella', terro ngagaliya ba' enyama'ana apa tong-settongnga keban jareya bi' manossa gella'. Nyamana saneyap keban jareya ngala' dhari nyama baberri'na manossa jareya.
2:20 Daddi sakabbinna keban se odhi' e tenggangan ban se odhi' e bang-abang eberri'i nyama bi' manossa jareya. Tape ban-keban jareya tadha' settonga se ekennenga gabay kanca se cocok se abantowa aba'na.
2:21 Saellana jareya manossa gella' bi' GUSTE Allah epatedhung sampe' ngeddha, ban teppa'na manossa jareya tedhung, GUSTE Allah mondhut sala settonga tolang roso'na, lampadda pas etotobi ban daging.
2:22 Tolang roso' jareya laju ebadhi oreng babine', pas ebakta ka manossa gella'.
2:23 Manossa jareya laju ngoca', "Areya' oreng se padha ban sengko' -- tolang dhari tang tolang, ban daging dhari tang daging. Bi' sengko' enyama'ana babine', polana oreng reya ekala' dhari lalake'." *E dhalem basa Ibrani oca' kaangguy lalake' iya areya "ish", dineng kaangguy babine' iya areya "isha".*
2:24 Jareya asal molana oreng lalake' adina'agi rama ebuna apolong ban binena, ban se kadhuwa jareya pas daddi settong.
2:25 Oreng lalake' ban babine' jareya padha abangkang, tape padha ta' andhi' rassa todhus.