Jabur 76

76:1 Kaangguy pamimpinna koor. Eerenge calempong. Jaburra Asaf. Nyanyeyan.
76:2 Allah kalonta e Yehuda; asmana kasohor e Isra'il.
76:3 Yerusalim padalemmanna; Gumo' Siyon kalenggiyanna.
76:4 E jadhiya pakakas perrangnga moso, pana, tameng ban peddhang padha epaancor.
76:5 Molja onggu, Junandalem, Guste, lebbi agung dhari nong-gunong jaman lamba'.
76:6 Reng-oreng se bangalan ampon erampase, padha tatedhung ta' jaga pole. Rit-parjurit se gaga' parjuga ampon elang kakowadanna sadaja.
76:7 Ran-jaran sareng se nompa' padha labu terros mate e bakto ebentak Junandalem, Allahna Yakub.
76:8 Nako'e onggu Junandalem, GUSTE! Manabi Junandalem duka, pasera se kowat nahan?
76:9 Dhari langnge' Junandalem anyata'agi potosan; bume neng-enneng katako'en,
76:10 e bakto Junandalem ngadek badhi ngadili, masalamedda reng-oreng se etendhes e bume.
76:11 Reng-oreng se paleng galak amolja'agi Junandalem jugan, se gi' peggel padha ngangguy kaen karong menangka tandha sossa atena.
76:12 Teptebbi janjina ba'na ka GUSTE Allahna. Sa-bangsa se badha e ma'-semma'na, mara padha ngeba tor-ator ka Allah se ekatako'e oreng sadunnya.
76:13 Allah mapotong samangadda para pangobasa, to-rato padha katako'en ka Salerana.