Jabur 75

75:1 Kaangguy pamimpinna koor. Menorot nyanyeyan: Ja' mamosna. Jaburra Asaf. Nyanyeyan.
75:2 Abdidalem sadaja nyemba ka Junandalem, Guste, abdidalem asokkor ka Junandalem, sareng aberta'agi sadaja se makasambu' ate se elampa'agi Junandalem.
75:3 Allah adhabu, "Mon la napa' ka bakto se la etantowagi bi' Sengko', Sengko' ahakimana epaadila.
75:4 Mon bume agundhek ban mahlok saessena padha ngetter, Sengko' se makoko ga-canggana."
75:5 Sengko' ngoca' ka oreng se dujan asebbal sopaja ja' asebbal ros-terrosan.
75:6 Ka oreng jahat Sengko' ngoca' sopaja ja' thak-magathak tengkana. Ja' ja-maraja cethak, otaba ja-maraja caca.
75:7 Sabab panghakiman ta' dhateng dhari bara' otaba dhari temor, banne dhari dhaja otaba dhari lao'.
75:8 Se ahakime reya Allah dibi', se settong epamandhap, settonganna epatenggi.
75:9 Dukana PANGERAN akantha tobung se eastane, tobung se aesse anggur se towa. Bi' Allah essena eselen, pas kodu eenom bi' reng-oreng jahat e bume epa sampe' berse.
75:10 Tape sengko' paggun aberta'agi Allahna Yakub, anyanye ji-pojiyan amolja'agiya Salerana.
75:11 Allah bakal mapotonga kakowadanna oreng jahat, dineng oreng se becce' epasajana kowat.