Jabur 62

62:1 Kaangguy pamimpinna koor. Menorot: Yedutun. Jaburra Daud.
62:2 Tang sokma sabbar anante' Allah, pera' Salerana se bisa masalamet sengko' reya.
62:3 Pera' Salerana se ajaga ban masalamet sengko', Salerana se abillai sengko', sengko' ta' kera gundhek.
62:4 Sampe' bila ba'na kabbi nyerranga oreng se la padha ban geddhung se mereng, akantha geddhung se la para' gujura?
62:5 Ba'na pera' aneyat magaggara oreng jareya dhari kadhudhuganna se tenggi. Ba'na dujan lecek cacana; bibirra ba'na aberkadi, tape abasto e atena.
62:6 Tang sokma sabbar anante' Allah, pera' Salerana se bisa masalamet sengko' reya.
62:7 Pera' Salerana se ajaga ban masalamet sengko'; Salerana se abillai sengko', sengko' ta' kera gundhek.
62:8 Allah jareya se marenge sengko' kasalameddan ban kahormadan, Allah jareya se kowat, se ajaga ban se abillai tang aba'.
62:9 He tang bangsa, mara terros nyo'on ka Allah; totorragi essena atena ba'na ka Salerana, sabab Salerana jareya pangaobanna ba'na.
62:10 Manossa tadha' bidana ban nyaba sasergu'an, raja kene' padha tadha' argana. Mon etembang manossa reya etemmo ja' sanyatana dhammang, adhammangan dhari nyaba sasergu'an.
62:11 Ja' ngarep hasella pamerressan, ban ja' ngandellagi barang rampasan. La'-mala' mon kasogiyanna ba'na atamba, atena ba'na ja' pacekka' e jadhiya.
62:12 Pan-barampan kale sengko' ngedhing Allah adhabu ja' kakobasa'an reya asalla dhari Salerana,
62:13 ban pole ja' Allah reya teptep taresna. Junandalem, Guste, se apareng babales ka saneyap oreng, menorot lalakonna bang-sebang.