Jabur 61

61:1 Kaangguy pamimpinna koor. Eerenge calempong. Dhari Daud.
61:2 Ya Allah, peyarsa'agi serrona abdidalem, gateyagi du'a abdidalem.
61:3 Jau dhari compo' abdidalem aserro ka Junandalem, sabab abdidalem ampon ta' gadhuwan pangarebban pole. Aterragi abdidalem ka pangongseyan se aman, se monggu ka abdidalem talebat tenggina.
61:4 Sabab Junandalem pangaoban abdidalem, partahanan se kowat e dhalem ngadhebbi moso.
61:5 Nyo'ona edi abdidalem ngamponga kennengngan e kemahepon Junandalem saomorra, sopaja abdidalem aman ngaop e babana kalembangngepon Junandalem.
61:6 Sabab Junandalem ampon meyarsa janji abdidalem, Guste Allah, sareng marenge abdidalem sangkolan gadhuwanna oreng alem.
61:7 Moga rato lanjanga omor sopaja odhi' ron-temoron.
61:8 Moga salerana marenta'a salanjangnga menangka rato peleyanna Junandalem, Guste Allah, jaga'agi salerana e dhalem kataresna'an sareng kaestowannepon Junandalem.
61:9 Daddi abdidalem anyanye, mojiya Junandalem saterrossa, sambi neptebbana janji abdidalem e dhalem re-saarena.