Jabur 57

57:1 Kaangguy pamimpinna koor. Menorot nyanyeyan: Ja' mamosna. Jaburra Daud, e bakto buru ka dhalem guwa nyenglae Saul.
57:2 Kaneserre abdidalem, Guste, kaneserre abdidalem, sabab ka Junandalem abdidalem nyare pangaoban. Abdidalem nyare pangeteggan e baba'anna kalembangngepon Junandalem, anante' kantos kaleng busbus ambu.
57:3 Sengko' aserro ka Allah Se Mahatenggi, ka Allah se nolonge sengko'.
57:4 Dhari sowarga Allah nyaot ban masalamet sengko'; makala reng-oreng se nendhes sengko'. Allah noduwagiya ja' Salerana esto ka sengko', ban taresna terros ka sengko'.
57:5 Sengko' ekeppong moso, se akantha macan se ngakanan manossa. Gigina akantha tombak ban pana, jilana akantha peddhang se ce' tajemma.
57:6 Ya Allah, ngereng duduwagi kaagungannepon Junandalem e langnge', sareng kamolja'annepon Junandalem e bume.
57:7 Moso abdidalem masang jebbak ajira'a abdidalem, abdidalem ce' sossana. E lorong se elebadi abdidalem epasange lobang, namong oreng gapaneka dibi' se gaggar labu ka dhalem lobang gapaneka.
57:8 Abdidalem parcaja onggu, Guste Allah, parcaja onggu, abdidalem anyanye ngagungngagiya Junandalem.
57:9 Mara jaga, tang sokma! Mara jaga gambus ban calempong! Sengko' ajaga'ana pajjar.
57:10 Guste Pangeran, abdidalem asokkora ka Junandalem, e antaraepon sa-bangsa. Abdidalem terro anyanyeya nyanyeyan pojiyan kaagem Junandalem e antaraepon ommat manossa.
57:11 Sabab kataresna'annepon Junandalem raja kantos ka langnge' ban kaestowannepon Junandalem kantos ka ondhem.
57:12 Ya Allah, ngereng duduwagi kaagungannepon Junandalem e langnge', sareng kamolja'annepon Junandalem e bume.