Jabur 36

36:1 Kaangguy pamimpinna koor. Dhari Daud, abdina PANGERAN.
36:2 Dusa asowara e dhalem atena oreng jahat oreng jareya ta' tako' sakale ka Allah.
36:3 Oreng jareya nganggep aba'na ce' tenggina sampe' ta' apangrasa ka kasala'anna, ban ta' baji' ka dusana jareya.
36:4 Cacana juba' ban lecek oreng jareya ta' ajalannagi pole se bicaksana ban se becce'.
36:5 E katedhunganna andhi' sajja jahat; tengkana tadha' se bagusa se jahat tadha' se etolaga.
36:6 GUSTE, kataresna'annepon Junandalem salangnge' tenggina, kaestowannepon Junandalem kantos gan ondhem.
36:7 Kasaeyannepon Junandalem sagunong tenggina, kaadilannepon Junandalem akadi tase' raja dhalemma; keban sareng manossa sareng Junandalem epeyara.
36:8 Ya Allah, kataresna'annepon Junandalem raja argana, manossa ngaop e baba'anna kalembangngepon Junandalem.
36:9 Manossa padha tobuk neddha teddha'an se ta' sakera-kera e dalemmepon Junandalem, tobuk ngenom dhari songayyepon Junandalem se segger.
36:10 Junandalem somberrepon odhi'na mahlok sadajana, e dhalem terrangngepon Junandalem abdidalem sadaja nengale terrang.
36:11 Moga Junandalem teptebba taresna ka oreng se oneng ka Junandalem, sareng teptebba sae ka oreng se sae atena.
36:12 Ja' diggal abdidalem eserrang oreng se angga' otabana etondhung oreng se jahat.
36:13 Oladi, oreng ngalakone kajahadanna padha labu, ngalto' ta' kengeng jaga pole.