Jabur 20

20:1 Kaangguy pamimpinna koor. Jaburra Daud.
20:2 Moga PANGERAN nyaodana ba'na e dhalem karekongan, moga kobasana Allahna Yakub marengana pangaoban ka ba'na!
20:3 Moga ba'na eparengngana partolongan dhari kalenggiyanna ban eparengngana bantowan dhari Gumo' Siyon.
20:4 Moga Salerana emoda ka sakabbinna tor-atorra ba'na, sarta kasokana narema kurban obbaranna ba'na.
20:5 Moga ekabbulana apa pangaterrona ba'na, ban eparengngana ahasel se daddi sajjana.
20:6 Daddi sengko' kabbi padha asorak, polana kamennanganna ba'na, ban ngonjuk bul-ombul mojiya Allah. Moga PANGERAN ngabbulana sakabbinna parnyo'onanna ba'na.
20:7 Sateya sengko' tao ja' PANGERAN apareng kamennangan ka rato peleyanna. PANGERAN nyaodi rato jareya dhari sowargana se socce; dhari kobasana PANGERAN rato jareya olle kamennangan se raja.
20:8 Badha oreng se ngandellagi kareta perrangnga, badha pole se ngandellagi jaranna. Tape sengko' ban ba'na ngandellagi kobasana PANGERAN, Allah se esemba sengko' ban ba'na.
20:9 Reng-oreng se kantha jareya bakal tatandhunga terros labu, tape sengko' ban ba'na bakal jaga'a sarta manjeng koko.
20:10 GUSTE, parenge kamennangan ka rato, parenge jawaban manabi abdidalem sadaja aserro.