Jabur 148

148:1 Molja'agi PANGERAN! Molja'agi PANGERAN, sakabbinna essena sowarga! Kabbi se badha e kennengngan se tenggi, molja'agi Salerana!
148:2 Para malaekadda Pangeran, molja'agi Salerana, sakabbinna tantara sowarga, molja'agi Salerana!
148:3 Molja'agi Salerana, are ban bulan, molja'agi Salerana, tang-bintang se rap-galiraban!
148:4 Molja'agi Salerana, langnge' se paleng tenggi, molja'agi Salerana, aeng e attas langnge'! *aeng e attas langnge': Baca Kad. 1:6-7.*
148:5 Mara kabbi padha ngagungngagi asmana PANGERAN, sabab kabbi reya epabadha lantaran dhabuna.
148:6 Pangeran se nantowagi kennengnganna bang-sebang, kateptebban jareya etantowagi kaangguy salanjangnga.
148:7 Molja'agi PANGERAN, saessena bume, ga-naga tase' ban sakabbinna sagara se lebar;
148:8 kelap ban ojan es, salju ban ondhem, kaleng busbus se atoro' ka papakonna PANGERAN!
148:9 Molja'agi Salerana, mo'-gumo' ban nong-gunong, bungkana wa'-buwa'an ban las-alas;
148:10 sakabbinna ebin ban keban alasan, sakabbinna keban se agalajar ban no'-mano'!
148:11 Molja'agi Salerana, to-rato ban sa-bangsa, sakabbinna oreng agung ban para pangobasa;
148:12 ngangodhadan lake' ban bine', oreng towa ban oreng ngodha.
148:13 Mara kabbi ngagungngagi asmana PANGERAN, sabab asmana lebbi agung dhari sakabbinna nyama; kaagunganna ngongkole langnge' ban bume.
148:14 Salerana la makowat bangsana, sampe' Salerana egung-agungngagi ommadda, Isra'il, ommadda se kataresnan. Molja'agi PANGERAN!