Jabur 147

147:1 Molja'agi PANGERAN! Sabab becce' ngagungngagi Salerana, ban anyanye ngagungngagi Salerana masenneng ate ban pekkeran.
147:2 PANGERAN mabali Yerusalim akantha asalla; abakta mole reng-oreng buwangan.
147:3 Salerana mabaras oreng se kaelangan pangarebban, sarta abetbet ka-lokana.
147:4 Pangeran se nantowagi bannya'na bintang e langnge', se apareng nyama ka tong-settongnga.
147:5 Agung ban kobasa onggu Pangeran sengko' ban ba'na, kabicaksana'anna tadha' engganna.
147:6 Oreng se tatendhes epajaga, tape oreng se jahat ebantengngagi ka tana.
147:7 Mara anyanye ji-pojiyan kaator ka PANGERAN, tabbu calempongnga kaator ka Allahna sengko' ban ba'na.
147:8 Salerana se ngampar ondhem e langnge'; se nyadhiya'agi ojan kaangguy bume, ban matombu rebba e mo'-gumo'.
147:9 Pangeran jareya se apareng kakan ka ban-keban, ban ka budhu'na dhangdhang se lok-ologan.
147:10 Se ekasokane Pangeran banne jaran se kowat; ban banne parjurit se bangalan.
147:11 Se ekasokane Pangeran oreng se ta'at ka Salerana, ka oreng se teptep ngarep kataresna'anna.
147:12 Mara molja'agi PANGERAN, Yerusalim! Molja'agi Allahna ba'na, Siyon!
147:13 Sabab Salerana makoko bang-labang sakethengnga ba'na, ban aberkadi pandhudhu'na.
147:14 Salerana ajaga dhaerana ba'na sopaja teptebba aman, makennyang ba'na ban gandum se paleng bagus.
147:15 Salerana apareng papakon ka bume, dhadhabun jareya laju duli elakone.
147:16 Salju epatoron akantha kapas, ebbun etabur akantha abu ban tana.
147:17 Salerana matoron ojan es akantha baliker; tadha' se kellar nahan cellebba.
147:18 Kalaban dhabuna es jareya laju ancar; aeng nyerroppagi, aeng laju agili.
147:19 Salerana apareng pessen ka ommadda, kateptebban ban hokomma ka ommat peleyanna.
147:20 Ka sa-bangsa laen Pangeran ta' kantha jareya, sabab sa-bangsa jareya ta' kennal ka kom-hokomma. Molja'agi PANGERAN!