Jabur 140

140:1 Kaangguy pamimpinna koor. Jaburra Daud.
140:2 Pasalamettagi abdidalem dhari oreng daraka, GUSTE, jaga'agi abdidalem ngadhebbi oreng se ngalakone kakerrasan.
140:3 Reng-oreng gapaneka asajja jahat e dhalem ate, matokaran oreng sabban are.
140:4 Jilana akadi olar se badha opassa, cacana akadi opassa olar sendhu'.
140:5 Adhu GUSTE, palopottagi abdidalem dhari kobasana oreng jahat, jaga'agi abdidalem ngadhebbi oreng se ngalakone kakerrasan se amaksod maancora abdidalem.
140:6 Oreng angga' ta' asa'-kasa' masang jira' nangkebba abdidalem, sareng masang jaring mega'a abdidalem. E salanjangnga lorong reng-oreng gapaneka masang jebbak ajira'a abdidalem.
140:7 Adhu GUSTE, abdidalem mator: Junandalem Allah abdidalem, peyarsa'agi du'a parnyo'onan abdidalem.
140:8 Guste ALLAH, Pangeran kaula, Allah se kowat, panyalamedda abdidalem, Junandalem masalamet abdidalem e dhalem paperrangan.
140:9 Ja' kabbuli pangaterroepon oreng jahat, GUSTE, ja' kantos sajjaepon reng-oreng gapaneka ahasel.
140:10 Ja' kantos moso abdidalem mennang; moga caca se jahat se ekoca'agi reng-oreng gapaneka eparengngana ngenneng ka badanna oreng se metenna abdidalem ka'dhinto.
140:11 Moga reng-oreng gapaneka kaojanana mardha, sareng ebuwang ka dhalem lobangnga maot, kantos ta' bisa kalowar pole.
140:12 Moga oreng se ngalakone kakerrasan manggiya balai, ja' edine tokang petenna ngennengnge bume.
140:13 Abdidalem oneng Junandalem apareng kaadilan ka oreng se tatendhes, sareng nolonge parkarana oreng se mesken.
140:14 Oreng jujur badhi ngagungngagiya Junandalem; sadajana padha apolonga sareng Junandalem.