Jabur 136

136:1 Mara asokkor ka PANGERAN, sabab PANGERAN reya sae; kataresna'anna langgeng tadha' obana.
136:2 Mara asokkor ka Allah Se Settong; kataresna'anna langgeng tadha' obana.
136:3 Mara asokkor ka Pangeran Se Mahatenggi; kataresna'anna langgeng tadha' obana.
136:4 Coma Salerana se mabadha kaajiban-kaajiban se raja; kataresna'anna langgeng tadha' obana.
136:5 Kalaban kabicaksana'anna Salerana abadhi langnge'; kataresna'anna langgeng tadha' obana.
136:6 Salerana se ngampar bume e attassa aeng; kataresna'anna langgeng tadha' obana.
136:7 Salerana se abadhi sabarang se tera' e langnge'; kataresna'anna langgeng tadha' obana;
136:8 se abadhi are se epangobasane seyang; kataresna'anna langgeng tadha' obana;
136:9 bulan ban tang-bintang se epangobasane malem; kataresna'anna langgeng tadha' obana.
136:10 Salerana se mate'e na'-ana' sareyang e Messer; kataresna'anna langgeng tadha' obana.
136:11 Isra'il ebakta kalowar dhari Messer; kataresna'anna langgeng tadha obana;
136:12 kalaban astana se kowat ban parjuga; kataresna'anna langgeng tadha' obana;
136:13 Tase' Galagas eseba' madhuwa; kataresna'anna langgeng tadha' obana;
136:14 Isra'il ommadda ebakta alengka tase' jareya; kataresna'anna langgeng tadha' obana.
136:15 Tape rato Messer ban tantarana epatasellem tadha' karena; kataresna'anna langgeng tadha' obana.
136:16 Salerana se mimpin ommadda lebat e ra-ara; kataresna'anna langgeng tadha' obana.
136:17 Salerana se makala to-rato se parjuga; kataresna'anna langgeng tadha' obana;
136:18 Salerana se mate'e to-rato se kasohor; kataresna'anna langgeng tadha' obana;
136:19 Sihon, rato Amori; kataresna'anna langgeng tadha' obana;
136:20 ban Og, rato Basyan; kataresna'anna langgeng tadha' obana.
136:21 Nagarana erampas, eparengngagi ka ommadda; kataresna'anna langgeng tadha' obana;
136:22 epadaddi andhi'na Isra'il abdina; kataresna'anna langgeng tadha' obana.
136:23 Salerana ta' kalep ka sengko' ban ba'na e bakto epakala; kataresna'anna langgeng tadha' obana.
136:24 Sengko' ban ba'na epalopot dhari tanangnga moso; kataresna'anna langgeng tadha' obana.
136:25 Saneyap mahlok eparenge pakan; kataresna'anna langgeng tadha' obana.
136:26 Mara asokkor ka Allah se ngobasane langnge'; kataresna'anna langgeng tadha' obana.