Jabur 135

135:1 Molja'agi PANGERAN! Molja'agi asmana PANGERAN, mara molja'agi, para abdina
135:2 se abakte e Padalemman Socce e kalenggiyanna Allahna sengko' ban ba'na.
135:3 Molja'agi PANGERAN, sabab Pangeran reya sae, molja'agi asmana, sabab Salerana lamba' ate.
135:4 Yakub epele epadaddi kaagunganna, ommat Isra'il epondhut Salerana.
135:5 Sabab sengko' tao PANGERAN reya agung onggu, agung ngalebbi'i diba se kemma'a bai.
135:6 Pangeran alampa'agi sabarang se daddi kasokanna, e langnge' ban e bume, e tase' ban e sagara se dhalem.
135:7 Dhari konco'na bume Pangeran madhateng ondhem, abadhi dhap-keddhap se noro'e ojan. Samarena pas marenta angen epakon kalowar dhari kennengnganna panyempennanna.
135:8 E Messer Salerana mate'e sakabbinna ana' sareyang ana'na manossa ban keban tadha' bidana.
135:9 E jadhiya Pangeran mabadha bannya' kaajiban ban tandha kaangguy ngokom rato ban para ponggaba.
135:10 Pangeran mate'e bangsa sabannya'na, bariya keya to-rato se parjuga.
135:11 Sihon rato Amori ban Og rato Basyan, ban sakabbinna to-rato Kana'an.
135:12 Nagarana to-rato jareya epassra'agi epadaddi andhi'na ommadda, Isra'il.
135:13 Junandalem badhi teptep eberta'agiya, GUSTE, asmana Junandalem badhi ekaemodana sadajana toronan.
135:14 Sabab Junandalem apareng kaadilan ka sadajana ommadda sareng bellas ase ka para abdina.
135:15 Brahalana reng-oreng gapaneka dhari emmas sareng salaka, badhiyanna tanangnga manossa.
135:16 Badha colo'na namong ta' bisa acaca, badha matana, namong ta' nengale pa-ponapa.
135:17 Badha kopengnga, namong ta' bisa ngedhing, dhari colo'na ta' kalowar nyaba.
135:18 Moga sapaneka'a jugan papasthenna reng-oreng se agabay, sareng parcaja ka ca-arca gapaneka.
135:19 Mara ommat Isra'il, molja'agi PANGERAN, molja'agi Salerana, mam-imamma Allah!
135:20 Molja'agi PANGERAN, he reng-oreng Lewi, molja'agi Salerana, ba'na kabbi se tako' ka Pangeran!
135:21 Molja'agi PANGERAN e Siyon, e Yerusalim ban e kalenggiyanna. Molja'agi PANGERAN!