Jabur 116

116:1 Sengko' taresna ka PANGERAN, sabab Pangeran meyarsa'agi tang parnyo'onan.
116:2 Pangeran meyarsa'agi tang sowara, sabban sengko' aserro ka Salerana.
116:3 Sengko' ekalenglenge babaja maot; ce' marengessa rassana ngadhebbi pate, sampe' sengko' ngalengsang ban tako'.
116:4 Daddi sengko' aera' ka PANGERAN, "Adhu GUSTE, nyo'ona tolong, parenge salamet abdidalem!"
116:5 PANGERAN reya bellas ase ban adil; Allahna sengko' ban ba'na neserran parana.
116:6 PANGERAN reya meyara reng-oreng se majja; sengko' epasalamet e bakto ta' bisa apa-rapa.
116:7 Sengko' maayem tang ate, sabab PANGERAN sae ka sengko'.
116:8 PANGERAN la malopot sengko' dhari pate; sengko' elepor ban ejaga sampe' sengko' ta' labu.
116:9 Daddi sengko' bisa ngarassa'agi kobassana odhi' e dunnya reya, e dhalem pangaobanna PANGERAN.
116:10 Sengko' paggun parcaja maske sengko' ngoca' kantha reya, "Sengko' taseksa parana."
116:11 E dhalem kabingongan sengko' ngoca' bariya, "Tadha' oreng se ekennenga parcaja."
116:12 Apa se eatorragiya sengko' ka PANGERAN, menangka babalessa kasaeyanna ka sengko' reya?
116:13 Sengko' ngeba'a tor-ator anggur ka PANGERAN, menangka tandha sokkor eparenge partolongan.
116:14 Sengko' neptebbana tang janji ka Salerana e adha'anna sakabbinna ommadda.
116:15 PANGERAN arassa ce' emanna mon badha oreng se ekataresnae Salerana mate.
116:16 Abdidalem ka'dhinto abdiepon Junandalem, GUSTE, akadi ebu, abdidalem jugan abakte ka Junandalem. Junandalem ampon mabebas abdidalem dhari tahanan.
116:17 Abdidalem ngatorragiya kurban sokkor ka Junandalem, sambi ngatorragiya du'a abdidalem.
116:18 Sengko' neptebbana tang janji ka Pangeran, e adha'na sakabbinna ommadda
116:19 se akompol e taneyanna Padalemman Socce, e tengngana kottha Yerusalim. Molja'agi PANGERAN!