Jabur 115

115:1 Banne abdidalem, GUSTE, banne abdidalem, namong Junandalem se kodu emolja'agi, sabab Junandalem esto sareng taresna salanjangnga.
115:2 Arapa sa-bangsa me' kodu ngoca', "E dhimma Allahna reng-oreng jareya?"
115:3 Allahna sengko' ban ba'na badha e sowarga, Salerana alampa'agi sabarang se daddi kasokanna.
115:4 Brahalana reng-oreng jareya dhari emmas ban salaka, gabayanna tanangnga manossa.
115:5 La-brahala jareya badha colo'na, tape ta' bisa acaca, badha matana, tape ta' nangale pa-apa.
115:6 Brahala jareya badha kopengnga, tape ta' ngedhing pa-apa, badha elongnga, tape ta' bisa nyeyom.
115:7 Brahala jareya badha tanangnga, tape ta' bisa araga, badha sokona, tape ta' bisa ajalan, ban ta' kalowar sowara dhari gerrunganna.
115:8 Mandar kantha'a jareya keya daddina reng-oreng se agabay ban se parcaja ka la-brahala jareya.
115:9 He ommat Isra'il, mara ngarep ka PANGERAN, Salerana se nolong ban ngaobi ba'na.
115:10 He para imam, mara ngarep ka PANGERAN, Salerana se nolong ban ngaobi ba'na.
115:11 He reng-oreng alem, mara ngarep ka PANGERAN, Salerana se nolong ban ngaobi ba'na.
115:12 PANGERAN emot ban apareng berkat ka sengko' ban ba'na, Salerana bakal aberkadana ommat Isra'il ban sakabbinna imam toronanna Harun.
115:13 Pangeran bakal aberkadana reng-oreng alem, se raja, bariya keya se kene'.
115:14 Moga PANGERAN marengana bannya' ana', ka ba'na ban toronanna.
115:15 Moga ba'na eberkadana bi' PANGERAN, se nyepta'agi langnge' ban bume!
115:16 Langnge' reya kaagunganna PANGERAN malolo, tape bume eparengngagi ka manossa terros.
115:17 PANGERAN ta' eagungngagi bi' oreng mate, bi' oreng se la toron ka tana se seppe.
115:18 Tape sengko' ban ba'na se odhi' reya asokkor ka Salerana, sateya ban salanjangnga. Molja'agi PANGERAN!