Jabur 111

111:1 Molja'agi PANGERAN! Sengko' asokkor ka PANGERAN sampe' ka dhasarra ate, e nga'-tengnga'anna kompolanna ommadda.
111:2 Ajib onggu sabarang se elampa'agi PANGERAN, patot etalektegi reng-oreng se lebur ka Salerana.
111:3 Sabarang se elampa'agi PANGERAN reya agung ban makasambu' atena manossa, kaadilanna langgeng saterrossa.
111:4 PANGERAN reya bellas ase, alampa'agi sabarang se makasambu' ate, sengko' ban ba'na sopaja teptebba enga' ka Salerana.
111:5 Pangeran marenge rajekke ka oreng se abakte ka Salerana, sarta emot terros ka parjanjiyanna.
111:6 Salerana noduwagi kobasana ka ommadda, kalaban marenge ommat jareya tana sangkolanna sa-bangsa.
111:7 PANGERAN reya adil ban esto e dhalem sabarang se elampa'agi, sakabbinna papakonna ekenneng andellagi.
111:8 Hokomma terros koko salanjangnga, eparengngagi sabendherra ban sajujurra.
111:9 Allah mabebas ommadda, mabadha parjanjiyan se langgeng ban reng-oreng jareya. Jareya PANGERAN se socce ban parjuga!
111:10 Sapa se terro bicaksana'a kodu hormat ka PANGERAN, Salerana apareng pangarteyan ka sakabbinna oreng se ta'at. Molja'agi PANGERAN salanjangnga!