Ayyub 41

41:1 Ba' bisa'a ba'na mega' baja Lewiyatan *Lewiyatan: Baca 3:8.* ngangguy panceng, otabana naja' jilana ngangguy tale?
41:2 Ba' bisa'a ba'na masang tongar ka elongnga, otabana e'-kae' besse ka tolangnga cangkemma?
41:3 Apa kerana Lewiyatan jareya menta ocol ka ba'na, otabana se-ngase menta kabellasan?
41:4 Apa kerana keban jareya mabadha parembagan ban ba'na, ngabdiya ka ba'na salanjangnga?
41:5 Apa kerana bi' ba'na etaleyana akantha mano' peyara'an, se masenneng atena la-kabula babine'an?
41:6 Apa kerana keban jareya ekadaganga bi' reng-oreng majang, egi-bagi e antarana oreng dagang?
41:7 Ba' bisa'a ba'na nyoddu'agi tombak amata tello' ka kole'na, otabana ngontallagi lembing sampe' terbas cethagga?
41:8 Kodda' sedding sakaleyan bai, tanto ba'na ta' kera adhukale'e; saomorra ba'na ta' kera loppa se akeket ban keban jareya.
41:9 Pa'-sapa'a se nangale Lewiyatan, tanto lempo, pas kalengnger robbu ka tana.
41:10 Galagga ta' jama' mon epajaga dhari tedhunga; tadha' oreng bangal manjeng e adha'anna.
41:11 Sapa bisa nyerrang Lewiyatan ban abali salamet ka bengkona? Tadha' oreng settonga se sanggup e dunnya reya.
41:12 Mara bi' Sengko' ba'na ebala'ana bagiyanna badanna Lewiyatan, saapa rajana ban kakowadanna badanna.
41:13 Tadha' oreng se bisa nyebbit kalambi lowarra, otabana maloka kalambi perrang se eangguy aba'na.
41:14 Sapa se bisa mokka' colo'na se kowat, se aesse gigi se nako'e manossa?
41:15 Balikadda akantha tameng se ason-soson, cekka' rapet, gali akantha bato.
41:16 Se settong nompang cekka' ka settonganna, sampe' ta' ekenneng lebadi angen balakka'.
41:17 Tameng jareya asambung cekka' ce' kokona, sapa'a bai ta' kera bisa mokka'.
41:18 Mon Lewiyatan aassim kalowar sonar akantha mardha, matana mancorong akantha are se moncar.
41:19 Apoy rabbang kalowar dhari colo'na, bur-nyembur ka lowaranna.
41:20 Dhari lobangnga elongnga kalowar okos, akantha okossa kaju se rabbang e baba'anna polo'.
41:21 Mardha rabbang mon ekenneng nyabana; apoy rabbang kalowar dhari colo'na.
41:22 Le'er budhina talebat kowadda, sapa se tatemmo tako' sampe' gujuden.
41:23 Tadha' bagiyan se lembu' e kole'na; kabbi padha ban baja galina.
41:24 Atena se akantha bato ta' tao mangmang, koko gali akantha bato gilingan.
41:25 Mon Lewiyatan jaga, oreng se paleng kowat sakale laju ngetter, ta' bisa apa-rapa lantaran katako'en.
41:26 Tadha' peddhang se bisa maloka kole'na; badanna ta' meddhas lembing, tombak otaba pana.
41:27 Besse eanggep padha ban darameyan, dimbaga eanggep lembu' akantha kaju se bucco' etombuwi kolat.
41:28 Ta' ekenneng oddak ban pana; mon ekotep ban bato eanggep darameyan.
41:29 Gada eanggep rebba kerreng salambar, mon oreng ngontallagi tombak ekala'-gella'.
41:30 Sesse' e tabu'na akantha belling se tajem konco'na, nyongkar tana lempong akantha nanggala. *nanggala: Pakakas reya ngangguy bagiyan-bagiyan se tajem dhari besse otaba bato, se epasang e baba'anna.*
41:31 Tase' egaluy sampe' padha ban aeng se ngalkal, akantha mennya' se ngelbuk e dhalem kattha.
41:32 Lampadda sokona asonar tera', aeng tase' eoba daddi kapo' se pote barnana.
41:33 E attas bume tadha' tandhinganna; mahlok jareya tadha' tako'na.
41:34 Keban se paleng raja ban kowat eanggep tadha' argana; e antarana sakabbinna burun alas, jareya ratona."