Ayyub 35

35:1-2 Ayyub, ba'na kalero mon ba'na nyangka ja' e dhalem pangoladanna Allah ba'na ta' andhi' sala.
35:3 Ba'na kalero mon atanya apa rogina ka Allah mon ba'na andhi' dusa, apa ollena ba'na mon ba'na ta' agabay dusa.
35:4 Sengko' se nyaodana ba'na, ban nyaodana tang ca-kanca.
35:5 Kodda' abassagi patete saapa tenggina ondhem e langnge'.
35:6 Allah ta' rogi, mon ba'na andhi' dusa. Allah ta' apa-rapa mon ba'na bannya' salana.
35:7 Mon ba'na alako becce', Allah ta' olle pa-apa. Allah ta' parlo pa-apa dhari ba'na.
35:8 Pera' sasamana ba'na se rogi polana sa-dusana ba'na, ban se olle kaontongan polana kabecce'anna ba'na.
35:9 Reng-oreng se ececce' tanto aserrowan; atharat menta partolongan.
35:10 Tape banne ka Allah, Panceptana, se apareng pangarebban e dhalem kasossa'an,
35:11 se marenge manossa akkal ban pekkeran, ngalebbi'i mano' ban keban e bume.
35:12 Reng-oreng se ececce' acerreng, tape Allah mendel malolo, lantaran reng-oreng jareya jahat ban sombong.
35:13 Tadha' gunana atharat salar-kellarra; sabab Se Mahakobasa ta' ngoladi ban ta' meyarsa serrona.
35:14 Ayyub, bi-lebbi pole mon ba'na ngoca' ja' ba'na ta' nangale'e Salerana, ja' parkarana ba'na la badha e ajunanna, ban ba'na te'-nante'an Salerana.
35:15 Ba'na ngera Allah ta' apareng okoman, ban ta' parduli manossa agabay kasala'an.
35:16 Tadha' gunana ba'na terros acaca; terrang, ba'na ta' ngarte apa se ekacaca.