Ayyub 23

23:1-2 Tape Ayyub nyaot, "Sengko' ateng-banteng aserro ka Allah; sengko' ta' bisa ngampet se aserrowa.
23:3 Ja' sakenga sengko' tao kalenggiyanna, sengko' ce' terrona nyabisa ka Salerana.
23:4 Sengko' matorragiya tang parkara ka Salerana, tang colo' dibi' se manapa'a.
23:5 Sengko' terro taowa baramma dhabuna, ban baramma jawabanna.
23:6 Apa kerana Allah nekkedda sengko' ban kakobasa'anna? Ta' kera! Allah tanto meyarsa'agi tang caca.
23:7 Sengko' ta' sala, bisa abilla tang aba' e ajunanna, tanto bi' Allah sengko' pas epabebas.
23:8-9 Sengko' nyare Allah e temor ban e bara', e lao' ban e dhaja, tape Allah ta' etemmo; tadha' e jadhiya.
23:10 Tape Allah ngagali saneyap tang tengka'. Ja' sakenga sengko' eoji epakantha emmas, tanto etemmo ja' tang ate reya morne.
23:11 Sengko' ta'at ban esto ka Salerana, salanjangnga ta' tao nyaleyot dhari jalanna.
23:12 Papakonna bi' sengko' etoro' terros, se daddi kasokanna elakone, banne noro' karebba tang ate.
23:13 Allah reya ta' tao aoba; tadha' se bisa mennang ka Salerana. Allah alampa'agi sabarang se daddi kasokanna.
23:14 Rancanana se etantowagi ka sengko' masthe elampa'agi, bariya keya rancana laenna se sabannya'na.
23:15 Sengko' ngetter lantaran tako' ka Salerana; sajan epekker sajan tako' rassana.
23:16-17 Bi' Se Mahakobasa sengko' epakene' ate, kabangalanna tang ate epatadha' sakale. Sengko' tako' ka Allah, banne polana petteng calemodan, maske sengko' ebuko'e papetteng jareya sampe' tang mata buta.