Ayyub 18

18:1-2 Bildad nyaot, "Bila ba'na se mareya acaca? Mara neng-enneng, edhingngagi sateya sengko' sakanca acaca'a.
18:3 Arapa sengko' sakanca bi' ba'na me' eanggep gendheng, me' eanggep padha ban sape?
18:4 Kapeggellanna ba'na pera' nyake'e aba'na dibi'. Apa polana kaparlowanna ba'na bume kodu epaseppe, nong-gunong bato kodu ealle?
18:5 Damarra oreng jahat tanto epate'e; apoyya ta' kera tao eodhi'i pole.
18:6 Sonar e dhalem kemahna la orem; damarra la ta' nyonar.
18:7 Tengka'na se mantep dhing-tabarindhing; babala'anna dibi' andaddiyagi aba'na tatandhung.
18:8 Sokona atengka' ka dhalem jaring, sampe' sokona takae'.
18:9 Tombedda takae' ka jebbak, aba'na cekka' tajira'.
18:10 Talena jira' epasang e dhalem tana; jebbak anganga e jalan se elebadana.
18:11 Oreng jahat takerjat polana barang se nako'e dhari man-dhimman; sabban tengka'na etoro' bunte' rassa katako'en.
18:12 Lamba' aba'na kowat, sateya nyangsara; balai dhateng neng e man-dhimman.
18:13 Kole'na topo ban panyaket se sara, tanang ban sokona bucco' kalowar nana.
18:14 Oreng jareya eeret dhari kemahna se daddi kennengnganna se aman, epangadhebba ka Ratona Pate.
18:15 Sateya sapa'a bai olle enneng e kemahna, kemahna etaburi balirang maelanga panyakedda. *balirang, maelanga panyakedda: jaman lamba' balirang eangguy aberse'e ko-bengko se orengnga se ngennengnge mate.*
18:16 Mo'-ramo'na padha kerreng ban kero', ca'-ranca'na padha elop.
18:17 Tadha' oreng se kennal pole ka aba'na e dhalem kotthana otaba e lowar nagarana; tadha' oreng settonga se enga' ka nyamana.
18:18 Dhari kennengngan se tera' etondhung ka pettengnga, dhari dunnyana oreng odhi' epanyengla.
18:19 Ta' andhi' ana' ban katoronan, tadha' karena settonga e kampongnga.
18:20 Ngedhing papasthenna se kantha jareya pandhudhu' e bara' padha tacengnga', pandhudhu' e temor padha katako'en.
18:21 Kantha jareya papasthenna oreng daraka, oreng se ta' marduli ka Allah."