Yesaya 3

3:1 Saongguna PANGERAN Se Mahakobasa bakal manyengla'a dhari Yerusalim ban Yehuda sakabbinna parsadhiya'anna kakanan ban nom-enoman. Bariya keya sakabbinna oreng se eandellagi e jadhiya, iya areya:
3:2 para pahlawan ban parjurit, hakim ban para nabbi, tokang ramal ban panasehat,
3:3 parwira, oreng penting ban nagarawan, tokang seher ban tokang tennong.
3:4 PANGERAN bakal ngangkada ngangodhadan epadaddiya pamimpinna ra'yat, se bakal marenta'a sakarebba dibi'.
3:5 Oreng bakal padha'a saleng seksa. Se ngodha ta' marduli se towa, se kene' ta' ngargai se raja.
3:6 E bakto jareya oreng bakal noddu'a sala settong dhari balana sambi ngoca', "Pera' ba'na se gi' andhi' angguy se pantes; daddi mara ba'na daddi pamimpinna sengko' kabbi e jaman se possa' ban kasossa'an reya."
3:7 Tape oreng jareya bakal nyaoda, "Sengko' banne dhukon! Sengko' ta' andhi' kakanan ban angguy keya. Ella, sengko' ja' soro daddi pamimpinna bangsa!"
3:8 Ongguwan, Yerusalim la gaggar! Yehuda la ngalotor! Sabab sabarang oca'na ban lalakonna reng-oreng jareya alaban ka PANGERAN ban nangtang kakobasa'anna.
3:9 Tengkana se sombong noduwagi kajahadanna. Reng-oreng jareya rang-terrangan alako dusa akantha oreng Sodom lamba' rowa. Palang reng-oreng jareya! Reng-oreng jareya madhateng calaka' ka aba'na dibi'.
3:10 Dhabuna PANGERAN, "Kabala ka reng-oreng se ta'at ka Sengko' ja' aba'na bakal sennengnga atena ban bakal salamedda. Reng-oreng jareya bakal ngarassa'agiya kobassana hasella lalakonna.
3:11 Tape palang oreng se daraka! Reng-oreng jareya bakal epakantha'a oreng laen se nanggung lalakonna reng-oreng jareya.
3:12 Tang ommat bakal enyek-enyegga tokang riba ban eperressa lenta darat. Tang ommat bakal egiba'a ka jalan se sala bi' para pamimpinna sampe' ta' tao pole jalan se kemma se kodu elebadi."
3:13 PANGERAN la siyap se agugada ban ngadilana ommadda.
3:14 PANGERAN bakal daddiya hakimma para pamimpinna ommadda. Areya' se earannagi PANGERAN ka reng-oreng jareya: "Ba'na se arampok hasella bun-kebbun anggur; bengkona ba'na possa' ban rang-barang ollena arampas andhi'na oreng mesken.
3:15 Arapa ba'na me' nyeksa Tang ommat ban merres oreng mesken? Sengko', Guste ALLAH Se Mahatenggi ban Mahakobasa la ngoca'."
3:16 Dhabuna PANGERAN, "Ce' sombongnga babine'an Yerusalim reya! Leter, dujan amaen mata ban angko pajalanna. Tengka'na ela-pola, lang-gellang sokona patang pakarincing.
3:17 Tape bi' Sengko' babine'an jareya eokoma; cethagga epabannya'a korengnga ban epagundhula."
3:18 Bakal napa'a baktona Pangeran mondhuda dhari babine'an Yerusalim jareya sakabbinna barang eyasanna se daddi andellanna: eyasanna cethagga, gellang sokona, kalongnga,
3:19 gellangnga tanangnga, totobba mowana,
3:20 burgu'na, mat-jimat e lengngenna ban e tengngana,
3:21 sello' ban teng-antengnga elongnga,
3:22 kalambi pestana se gus-bagus, gaun ban jubana, dhompedda,
3:23 kalambina se tepes, kalambi linenna, syalla le'erra ban burgu' lanjangnga.
3:24 Sateya ngangguy mennya' ro'om, dhaggi' menangka gantena mennya' ro'om, reng-oreng jareya bakal bacengnga bauna; sabbu'na se alos bakal eganteya tampar se kasar; cethagga se bagus obu'na bakal buthaga; menangka gantena kalambina se gus-bagus reng-oreng jareya bakal aganteya ngangguy kalambi dha-beddha; robana se raddin bakal aganteya daddi juba' matodhusan.
3:25 Lalake'an e kottha jareya, bariya keya se wat-kowat, bakal mateya e dhalem paperrangan.
3:26 E bang-labang sakethengnga kottha oreng bakal nangesa polana sossa, ban kotthana bakal padha'a ban babine' se ebangkange, ju'-toju' e tana.