Yesaya 33

33:1 Palang so-mosona sengko' ban ba'na! Reng-oreng jareya abigal maske ta' ebigal, akiyanat maske ta' ekiyanadi. Tape saellana arampok ban akiyanat, reng-oreng jareya dibi' bakal ebigala ban ekiyanadana.
33:2 Adhu, GUSTE, kabellasi abdidalem sadaja. Junandalem pangarebban abdidalem sadaja. Jaga'agi abdidalem sadaja sabban arena sareng parenge salamet e bakto karekongan.
33:3 Manabi Junandalem ngadek sareng makalowar sowara se agarudhu', sa-bangsa tanto padha buru asalebbudan.
33:4 Reng-oreng bakal dhatengnga nyerranga sareng arampoga dhi'-andhi'epon sa-bangsa gapaneka akadi balang se dhateng bal-ambalan.
33:5 PANGERAN reya talebat agung; ngobasane apa'a bai. Salerana bakal majaga'a hokom ban kaadilan e Yerusalim
33:6 ban aparenga kaamanan ka ommadda. Arta se masalamet reng-oreng jareya kabicaksana'an ban pangataowan sarta hormat ka PANGERAN.
33:7 Reng-oreng se gaga' ban bangalan aera' menta tolong; para otosan se aehteyar sopaja oreng padha'a rokon nanges ce' ngennessa.
33:8 Rong-lorong raja ce' babajana sampe' daddi seppe, ta' elebadi oreng. Parjanjiyan epongkere ban sabarang se la erembak etolak. Tadha' se eparduliya pole.
33:9 Nagarana edina'agi sampe' seppe. Las-alas Libanon elop, ra-cora Saron se landhu daddi akantha sagara beddhi. E Basan ban e Gunong Karmel un-dhaunan ngalotor kabbi.
33:10 PANGERAN adhabu ka bangsa jareya, "Sateya Sengko' jaga'a ban ngokoma ba'na kaangguy noduwagi Tang kakobasa'an.
33:11 Apa se daddi sajjana ba'na parcoma, ban sabarang se elakone ba'na tadha' gunana. Kapeggellanna ba'na akantha apoy se ngello' aba'na dibi'.
33:12 Ba'na akantha bato karang se eobbar ekagabaya kapor, akantha ombut se adhuri se epoger ban eobbar e dhalem apoy.
33:13 Dina oreng se semma' ban se jau me' olle padha ngedhing parkara Tang lalakon ban ngakone Tang kakobasa'an."
33:14 Reng-oreng se dusa e Siyon ngetter katako'en. Oca'na, "Kapotosanna Allah akantha apoy se rabbang salanjangnga. Sapa se kowadda neng e dhalem apoy se mamosna'an jareya?"
33:15 Ba'na bisa kowat mon caca ban lalakonna ba'na bendher. Ja' nyare kaontongan kalaban merres oreng mesken, ban ja' narema pesse go'-sogo'. Ja' noro' oreng se andhi' sajja mateyana oreng otaba se andhi' sajja ngalakonana kajahadan laenna.
33:16 Tanto ba'na salamet ban aman, akantha se badha e dhalem binteng se koko. Ba'na ta' kera posang nyare apa se ekakana ban apa se eenoma.
33:17 Bakal napa'a baktona ba'na nangale'e rato se marenta kalaban agung e nagara se ce' rajana.
33:18 Katako'anna ba'na se ba'-lamba'na ka reng-oreng manca se narek pajek, daddi pangobasa ban pangawas, bakal elanga ban pera' kare neng e dhalem ngen-angen malolo.
33:19 Ba'na ta' kera nangale'e pole reng-oreng manca se ta' tao adad se acaca ngangguy oca' se ta' epahame bi' ba'na.
33:20 Abassagi kottha Siyon, kennengnganna sengko' ban ba'na araya'agi re-are raja agama. Abassagi Yerusalim rowa! Kennengngan jareya ce' amanna mon ekennengnge, akantha kemah se ta' tao ealle, pajina ta' tao edabu' ban talena ta' tao pegga'.
33:21 PANGERAN bakal noduwagiya kaagunganna ka sengko' ban ba'na. Sengko' ban ba'na bakal odhi'a e penggirra songay se lebar, se ta' ekenneng lajari kapalla moso.
33:22-23 Parabudda kapalla tadha' gunana kabbi; jar-lajarra ta' ekenneng barbar! Dhi'-andhi'na moso erampasa kabbi bi' sengko' ban ba'na; arta jareya talebat bannya'na, sampe' oreng se empon olle bagiyan keya. PANGERAN dibi' se bakal daddiya ratona sengko' ban ba'na; se marenta'a, majaga'a hokom ban masalamedda sengko' ban ba'na dhari moso.
33:24 Ta' kera badha pole oreng aserro sake' e nagarana sengko' ban ba'na, ban reng-oreng se dusa bakal esapora'a kabbi.