Tangesan 3

3:1 Sengko' oreng se la ngarassa'agi sangsara lantaran katebanan dadukanna Allah.
3:2 Sajan abit sengko' sajan jau eeret Salerana ka kennengngan se petteng calemodan.
3:3 Allah ta' neser sakale ka sengko', saare benteng sengko' li-baliyan epokol.
3:4 Tang badan epaloka bakbak kabbi, tang lang-tolang epapotong.
3:5 Sengko' etotobi ban kasossa'an sarta kasangsara'an.
3:6 Sengko' epaksa enneng e pettengnga akantha oreng se la mate gi' lamba'na.
3:7 Sengko' ekalenthong epakoko, nyare jalan se kalowara ta' nemmo.
3:8 Sengko' atharat nyo'on partolongan, tape Allah ta' kasokan meyarsa'agi.
3:9 Tang jalan edhang-addhange ban dhung-geddhung bato.
3:10 Allah ngaddhang sengko' ta' kala ka baruwang, nyendhemme sengko' akantha macan se galak.
3:11 Sengko' eserser sampe' nyaleyot dhari jalan, pas ebit-sebbit, terros edina.
3:12 Gandhibana epenthang sengko' eacet ban panana.
3:13 Panana naccek terbas ka tang badan, terros ka tang kol-tongkolan.
3:14 Saare benteng sengko' ekala'-gella' sakabbinna oreng, eco-koco ban emon-semmone.
3:15 Se epakakan ban epaenom ka sengko' pera' se pae' akantha jamo.
3:16 Tang mowa egursong ka tana, tang gigi ebentorragi ka bato sampe' potthak.
3:17 La abit sengko' ta' arassa taremtem, la loppa sengko' baramma rassana oreng senneng.
3:18 Sengko' la ta' andhi' ka kasohoran, la mosna tang pangarep ka PANGERAN.
3:19 Mekkere palangnga tang aba' se alalana ta' nemmo tojjuwan, rassana padha ban se ngakan racon se pae'.
3:20 Sengko' ros-terrosan mekkere jareya, sampe' sompek ate rassana.
3:21 Tape tang pangarep dhateng pole, e bakto sengko' ngenga'e parkara reya:
3:22 Kataresna'anna PANGERAN reya tadha' pegga'na, rahmadda tadha' ambuna,
3:23 anyar terros sabban laggu, kaestowanna PANGERAN reya raja onggu!
3:24 Sengko' ta' andhi' pa-apa pole kajabana PANGERAN. Daddi sengko' ngarep ka Salerana.
3:25 PANGERAN becce' ka oreng se parcaja ka Salerana ban ka oreng se nyare Salerana.
3:26 Daddi, dina mara sengko' ban ba'na anante' kalaban atena se ayem sampe' PANGERAN apareng partolongan;
3:27 dina mara sengko' ban ba'na ajar pasabbar e bakto gi' ngodha.
3:28 E bakto PANGERAN apareng kasossa'an, mara padha toju' kadibi'an ta' acaca'an.
3:29 Dina mara sengko' ban ba'na marendha ban atellok, sabab sapa tao pangarebban gi' badha.
3:30 Maske etamper ban eya-seya, dina mara kabbi tarema.
3:31 Sabab Pangeran ta' kera nolak sengko' ban ba'na salanjangnga.
3:32 Saellana madhateng kasossa'an pas bellas pole ka sengko' ban ba'na, sabab kataresna'anna ka sengko' ban ba'na tadha' batessa.
3:33 Panggaliyanna ta' ehlas ban ta' perak e dhalem madhateng kasossa'an ka sengko' ban ba'na.
3:34 Mon sengko' ban ba'na sompek ban rekong e dhalem tahanan,
3:35 mon sengko' ban ba'na kaelangan ha' paparengnga Pangeran,
3:36 mon kaadilan elik-balik, Pangeran tanto ngagali ban agateyagi.
3:37 Manossa ta' kera bisa apa-rapa mon banne karsana Pangeran.
3:38 Se becce' ban se jahat kalakon polana Pangeran se makon.
3:39 Arapa oreng me' kathek aserrowan mon eokom polana sa-dusana?
3:40-41 Mara talektegi odhi'na sengko' ban ba'na, pas abali pole ka GUSTE Allah e sowarga. Mara bukka' atena pas adu'a,
3:42 "Abdidalem sadaja dusa sareng aberonta' ka Junandalem, GUSTE, ban Junandalem ta' kasokan ngampone.
3:43 Abdidalem sadaja sareng Junandalem eserser sareng epate'e, bellas asena Junandalem ta' katengal katotoban benduna.
3:44 Dukaepon Junandalem akadi ondhem se talebat kandella kantos ta' terbas sareng sadajana du'a dhari abdidalem sadaja.
3:45 Sareng Junandalem abdidalem sadaja epakadi kas-rakas e dhalem matana sa-bangsa sadajana.
3:46 Abdidalem sadaja eya-seya sareng ekala'-gella' moso;
3:47 katebanan calaka' sareng padha ancor, odhi' e dhalem babaja, ros-terrosan arassa tako'.
3:48 Aeng mata abdidalem agili akadi songay lantaran bangsa abdidalem ampon ancor ataltalan.
3:49 Abdidalem nangesa ta' ambuwa,
3:50 kantos Junandalem, GUSTE, se jumenneng e sowarga kasokan agateyagi abdidalem sadaja.
3:51 Abdidalem arassa ngennes nengale babine'an e kottha abdidalem.
3:52 Abdidalem padha sareng mano', eserser moso, se baji' ka abdidalem ta' kalaban badha sababba.
3:53 Abdidalem ecabbur dhi'-odhi' ka dhalem somor se kerreng, laju etombugi bato.
3:54 Aeng ongga kantos gan cethak, abdidalem laju apekker, 'Mate sengko'!'
3:55 Adhu GUSTE, abdidalem aera' ka Junandalem dhari dhasarra somor se dhalem ka'dhinto.
3:56-57 Abdidalem nyo'ona kalaban sanget, ngereng ja' makopok, Guste, peyarsa'agi parnyo'onan abdidalem, nyo'ona tolong, Guste. Daddi Junandalem meyarsa du'a abdidalem, Junandalem nyander, laju adhabu, 'Ella, ja' tako'.'
3:58 Junandalem rabu nolonge parkara abdidalem, Guste, sareng masalamet nyaba abdidalem.
3:59-60 Junandalem ngoladi kajahadanna oreng ka abdidalem, neyat juba'na moso se baji' ka abdidalem. Daddi, Guste, billa'agi parkara abdidalem.
3:61 Junandalem ngagali, GUSTE, abdidalem eya-seya; Junandalem ngagali sadaja sajjana reng-oreng gapaneka.
3:62 Reng-oreng gapaneka ngacaca abdidalem saare benteng, asajja juba' macalaka'a abdidalem.
3:63 Dhari gu-laggu kantos malem, abdidalem ekala'-gella' malolo.
3:64 Okommagi reng-oreng gapaneka, GUSTE, sabandhing sareng lalakonna.
3:65 Bastowagi reng-oreng gapaneka, me' olle ta' gadhuwan pangarep saterrossa.
3:66 Serser sareng pate'e sadajana, kantos berse tadha' karena e dunnya."