Bangsalan 22

22:1 Nyama se bagus lebbi aji etembang arta sabannya'na; ekataresnae oreng lebbi becce' etembang eberri' emmas ban salaka.
22:2 Oreng sogi ban oreng mesken padha bai e dhalem settong parkara, iya areya: padha cepta'anna PANGERAN.
22:3 Oreng bicaksana majau mon nangale babaja; oreng budhu ajalan terros sampe' calaka'.
22:4 Oreng se ta'at ka PANGERAN ban andhap asor tengkana bakal sennengnga, ma'mor ban ehormadi odhi'na.
22:5 Jira' ban jebbak badha e jalanna oreng juba'; jauwi jareya mon ba'na terro salamedda.
22:6 Ajari na'-kana' carana odhi' se teppa', sampe' towana kana' jareya tanto odhi' kantha jareya.
22:7 Oreng sogi ngobasane oreng mesken; oreng se ngenjam ngobasane se maenjame.
22:8 Oreng se nabur barang se ta' jujur bakal calaka'a; dhi-budhina kobasana kaangguy ngala' karebba dibi' bakal mosna'a.
22:9 Oreng se bagus atena eberkadi Pangeran, polana gi-magi rajekkena ka oreng se kakorangan.
22:10 Tondhung oreng se dujan ya-nyeya, sopaja tadha' pole oreng atokaran, saleng cale ban amosowan.
22:11 Oreng se berse atena ban manes cacana, bakal daddiya sahabadda rato.
22:12 Kalaban abungkar kaleceganna oreng se ta' jujur, PANGERAN ajaga sopaja pangataowan se bendher teptep aman.
22:13 Oreng se males lebur enneng e bengkona; ca'na oca'na, "E lowar badha macan, sengko' tako' eceppa' mon ajalanan."
22:14 Cacana sondel se lemma' manes reya jebbagan, oreng se ebendune PANGERAN tabalusok ka dhalemmanna.
22:15 La sapantessa na'-ana' ngalakone sabarang se budhu, tape tengka jareya ekenneng oba bi' tongket manjalin.
22:16 Sapa se terro sogiya kalaban nendhes oreng mesken ban ngeba tor-ator ka oreng sogi dhi-budhina bakal malarada odhi'na.
22:17 Mara edhingngagi, sengko' ngajarragiya ka ba'na babala'anna oreng penter! Edhingngagi pateppa' tang pangajaran reya.
22:18 Ba'na bakal sennengnga mon tang pangajaran reya bi' ba'na esempen e dhalem atena. Sabab kalaban cara se kantha jareya, bila'a bai bi' ba'na ekaparlo, bisa eangguy.
22:19 Sengko' ngajarragiya ka ba'na sateya polana sengko' terro sopaja ba'na parcaja'a ka PANGERAN.
22:20 Bi' sengko' ba'na la enolessagi babala'an tello polo meggi' -- babala'an se agandhu' pangataowan ban petodu se gus-bagus;
22:21 babala'an jareya bakal ngajarragiya ka ba'na parkara apa se bendher ongguwan, sopaja ba'na bisa'a aberri' jawaban se teppa' mon ba'na etanyae oreng.
22:22 Ja' marogi oreng mesken, pera' lantaran oreng mesken jareya ta' andhi' kakowadan; ban mon e pangadilan ja' nyek-ngenyek oreng se ta' bisa apa-rapa.
22:23 Sabab PANGERAN bakal nolongana reng-oreng jareya e dhalem parkarana, ban bakal nyabuda nyabana oreng se nendhes reng-oreng jareya.
22:24 Ja' apolongan ban oreng se lekkas peggel ban se ceppet panas atena.
22:25 Dhaggi' ba'na pas nerowe, pas ta' bisa pole maelang kabiyasa'an jareya.
22:26 Ja' ajanji nanggunga otangnga oreng laen.
22:27 Dhaggi' mon ba'na ta' sanggup alonase, katedhunganna ba'na tanoro' erampas keya.
22:28 Ja' sampe' ba'na ngerset batessa tana se la eteptebbagi bi' bangatowana ba'na.
22:29 Ba' taowa ba'na nangale'e oreng se penter ngalakone panggabayanna? Oreng jareya bakal epalakowa e karatonna to-rato, banne e bengko biyasa.