Bangsalan 15

15:1 Mon nyaot epalaba, ate peggel daddi sabbar; jawaban se peddhes mapeggel ate.
15:2 Cacana oreng bicaksana andaddiyagi pangataowan masen-neng ate; cacana oreng budhu coma aesse kabudhuwan.
15:3 PANGERAN ngoladi sabarang se kadaddiyan e dhimma'a bai; Salerana ngoladi ka sabarang se becce' ban se juba'.
15:4 Ca'-oca' se bagus nambai samangat, ca'-oca' se nyake'e ate mamateyan karep.
15:5 Oreng budhu ta' parduli babala'anna eppa'na, oreng bicaksana agateyagi parengeddan.
15:6 E bengkona oreng becce' bannya' artana; artana oreng jahat mosna lantaran karekongan.
15:7 Ca'-oca'an oreng bicaksana aesse pangataowan, tape pekkeranna oreng budhu ta' kantha jareya.
15:8 PANGERAN narema du'ana oreng se becce', tape baji' ka tor-atorra oreng se juba' ate.
15:9 PANGERAN baji' ka cara odhi'na oreng daraka, tape taresna ka oreng se aehteyar ajalannagi kasokanna.
15:10 Oreng se alako juba' bakal eseksa'a; oreng se ta' endha' epateppa' bakal mateya.
15:11 PANGERAN ngagali ka dunnyana oreng mate ban ke'-lekke'na; baramma se bisa'a pekkeranna manossa eerrep dhari Salerana?
15:12 Oreng se dujan ya-nyeya ta' endha' mon epaenga'; ta' endha' menta babala'an dhari oreng se bicaksana.
15:13 Se senneng atena binar mowana; ate sossa maorem sonarra mata.
15:14 Oreng bicaksana nyare pangataowan; oreng budhu repot ban kabudhuwanna.
15:15 Oreng se orem kodu aperrang terros e dhalem odhi'na, tape oreng se gumbira senneng terros atena.
15:16 Lebbi becce' sakone' artana tape tako' ka PANGERAN, katembang bannya' dhi-andhi'na tape tako' ros-terrosan.
15:17 Lebbi becce' ngakan ngan-gangan etoro'e ate taresna, katembang ngakan daging se nyaman etoro'e kabaji'an.
15:18 Oreng se lekkas peggel madhateng tokar, oreng se sabbar madhateng karokonan.
15:19 Oreng males tanto terros nemmo karekongan; oreng jujur ta' nemmo kasossa'an.
15:20 Ana' se bicaksana masenneng atena eppa'na; ana' se budhu ta' ngargai ebuna.
15:21 Kabudhuwan reya se masenneng atena oreng gendheng, oreng bicaksana odhi'na loros.
15:22 Apa se ekasajja ta' ahasel mon ta' etoro'e partembangan; se ekasajja ahasel mon bannya' se aberri' babala'an.
15:23 Caca se ekoca'agi teppa' baktona masenneng pekkeran.
15:24 Oreng bicaksana lebat e ga'-ongga'an se nojju ka kaodhi'an, banne ron-toronan se nojju ka pate.
15:25 PANGERAN bakal magujura bengkona oreng se angga', tape ngaobana tanana randha.
15:26 PANGERAN baji' ka sajja se juba', tape ca'-oca' se bagus masenneng panggaliyanna.
15:27 Sapa se nyare kaontongan se ta' halal, maancor kaliwargana dibi'. Sapa se ta' endha' ka pesse go'-sogo' bakal sennengnga odhi'na.
15:28 Oreng becce' mon ca'-ngoca'a epekker sabellunna; oreng jahat dujan ngoca'agi parkara se juba'.
15:29 Du'ana oreng becce' bi' PANGERAN epeyarsa'agi, tape oreng daraka ta' eparduli.
15:30 Mowa se binar masenneng ate, kabar becce' masegger tolang.
15:31 Oreng se endha' epaenga' nyamana oreng bicaksana.
15:32 Oreng se ta' endha' narema babala'an, ta' ngargai aba'na dibi'; oreng se endha' narema babala'an daddi oreng se tenggi buddina.
15:33 Tako' ka PANGERAN reya dhasarra pangajaran se teppa'; oreng kodu andhap asor sabellunna olle kahormadan.