Bangsalan 11

11:1 PANGERAN baji' ka oreng se ngangguy tembangan se ta' cocok, tape lebur ka oreng se ngangguy tembangan se teppa'.
11:2 Oreng se sombong bakal eya'-seya'a; oreng se andhap asor reya bicaksana.
11:3 Oreng becce' etonton bi' kajujuran; oreng se lecegan epaancor bi' kaleceganna.
11:4 Mon ngadhebbi maot arta tadha' artena; odhi'na ba'na tanto salamet mon ba'na berse atena.
11:5 Kajujuran magampang jalanna odhi'na oreng becce', tape oreng jahat maancor odhi'na dibi'.
11:6 Oreng jujur salamet lantaran kabagusanna atena; oreng se ta' ekenneng parcaja tabalusok lantaran kadhakka'anna.
11:7 Mon oreng jahat mate, pangarebbanna noro' mate keya, pangarep se esandharragi ka kakowadan dibi' tadha' gunana.
11:8 Oreng alem epalopot dhari kasossa'an; oreng jahat se agante narema kasossa'anna.
11:9 Cacana oreng jahat mamateyan oreng; hekmadda oreng becce' masalamet oreng laen.
11:10 Kottha perak mon oreng jujur nemmo rajekke; ra'yat rak-soragan mon oreng jahat mate.
11:11 Berkadda oreng jujur malebur kottha; cacana oreng jahat marosak kottha.
11:12 Ya-nyeya oreng laen reya lalakon budhu; oreng se alos buddina neng-enneng ta' acaca'an.
11:13 Oreng se dujan arasanan ta' bisa neggu' roseya, tape oreng se ekenneng parcaja bisa neggu' roseya.
11:14 Bangsa bakal ancora mon tadha' pamimpinna; sajan bannya' panasehat sajan aman kasalameddanna.
11:15 Ajanji majarana otangnga oreng laen alamat calaka'a; lebbi becce' ja' ro'-noro' parkara jareya mon terro salamedda.
11:16 Babine' se bagus buddina ehormadi oreng; oreng se kejjem marogi aba'na dibi.
11:17 Oreng se bagus atena maontong aba'na dibi'; oreng se kejjem marogi aba'na.
11:18 Kaontonganna oreng jahat banne kaontongan se sabendherra, kaontonganna oreng se alako becce' ganjaran raja.
11:19 Sapa se ta' ambu alako becce' bakal sennengngan odhi'na; sapa se maksa alako jahat bakal mateya.
11:20 PANGERAN baji' ka oreng se jahat atena, tape taresna ka oreng se odhi'na tadha' calena.
11:21 Oreng jahat masthe olle okoman, oreng becce' bakal salamedda.
11:22 Karaddinanna oreng babine' se juba' tengkana akantha sello' emmas e elongnga babi.
11:23 Pangaterrona oreng becce' madhateng kabecce'an, pangarebba oreng jahat mapeggel oreng bannya'.
11:24 Badha oreng se dujan ari'-berri', tape atamba sogi, badha se dujan ra'-nyerra' tape atamba ta' andhi'.
11:25 Oreng se bannya' ari'-berri' bakal narema'a sabannya'na, oreng se lebur atatolong tanto etolong oreng keya.
11:26 Sapa se nombuk gandum bakal ebastowa oreng, tape se ajuwal gandum bakal ealemma oreng.
11:27 Sapa se bajeng alako becce' ekaleburi oreng; sapa se nyare kajahadan bakal nemmowa kasossa'an.
11:28 Sapa se ngandellagi arta bakal ngalotora akantha dhaun se towa, oreng se alem bakal tombuwa akantha selbi' se ngodha.
11:29 Sapa se madhateng kasossa'an ka saessena bengkona bakal ta' andhi'a pa-apa. Oreng budhu bakal aladinana oreng se bicaksana.
11:30 Oreng se alem bakal salamedda odhi'na; oreng se bicaksana sajan bannya' etoro' oreng.
11:31 Mon e dunnya reya oreng becce' narema'a ganjaran, la terrang oreng jahat ban se dusa bakal narema'a okoman.